Athbhreithniú ar an gCód um Chosaint Tomhaltóirí
(Is gá fianáin a chur “ar siúl” chun breathnú ar an bhfíseán thíos)
Páipéar Comhairliúcháin ar an gCód um Chosaint Tomhaltóirí (Márta 2024)
Tá athbhreithniú cuimsitheach á dhéanamh ag Banc Ceannais na hÉireann ar an gCód um Chosaint Tomhaltóirí 2012.
Tá ár bPáipéar Comhairliúcháin seolta againn anois. Tugann an Páipéar Comhairliúcháin deis do pháirtithe leasmhara aiseolas a thabhairt maidir leis an gcaoi a bhfuil sé beartaithe againn an Cód um Chosaint Tomhaltóirí a nuashonrú.
Leis an athbhreithniú seo, tá sé mar aidhm againn Cód nuashonraithe nuachóirithe um Chosaint Tomhaltóirí a chur ar fáil a bheidh dírithe ar chosaint leasanna custaiméirí ag gnólachtaí. Tá sé seo riachtanach chun torthaí dearfacha a bhaint amach do thomhaltóirí.
Ina theannta sin, tá pacáiste spriocdhírithe cosaintí á moladh againn a fhreagraíonn don chaoi ina mbíonn seirbhísí airgeadais á rochtain ag tomhaltóirí sa lá atá inniu ann. Áirítear sa phacáiste sin tograí a bhaineann leis an digitiú, le heolas a chur ar fáil go héifeachtach, le creidmheas morgáiste agus le haistriú morgáiste, le gníomhaíochtaí neamhrialáilte, le calaois agus le sceamáil, le leochaileachtaí agus riosca aeráide.
Ar an iomlán, is mian linn an méid seo a leanas a dhéanamh:
• A chinntiú go gcuirfidh gnólachtaí leasanna custaiméirí san áireamh go héifeachtach ina gcuid straitéisí agus cinnteoireachta
• Soiléireacht a chur ar fáil do ghnólachtaí maidir lena gcuid oibleagáidí um chosaint tomhaltóirí
• Tacú le tomhaltóirí agus le gnólachtaí an Cód um Chosaint Tomhaltóirí a rochtain agus rudaí a aimsiú ann trí thacaíochtaí, treoracha agus mínithe ar líne a chur ar fáil.
Tá tuilleadh eolais maidir lenár dtograí anseo thíos.
Tá an Páipéar Comhairliúcháin ar oscailt le haghaidh aiseolais ar feadh trí mhí suas go dtí an 7 Meitheamh 2024.
Is féidir le páirtithe leasmhara aighneachtaí a dhéanamh leis an ríomhphost chuig: [email protected] nó leis an bpost chuig Banc Ceannais na hÉireann, Bosca PO 559, Baile Átha Cliath 1.
Ár gComhairliúchán
I gCaibidil 1 den Pháipéar Comhairliúcháin, leagtar amach na cúiseanna a bhfuil athbhreithniú á dhéanamh againn ar an gCód um Chosaint Tomhaltóirí agus na haidhmeanna atá againn leis an gCód reatha a nuashonrú. Sa chaibidil seo freisin, tugtar cuntas ar na tosca éagsúla a bhí mar bhonn eolais dár dtograí beartais agus tugtar forbhreathnú ardleibhéil ar a bhfuil beartaithe againn chun an Cód um Chosaint Tomhaltóirí a nuashonrú agus na chéad chéimeanna eile.
Léigh Caibidil 1 ina hiomláine
Nóta: Ní oibreoidh naisc dhíreacha pdf d’úsáideoirí a bheidh ag brabhsáil ar Safari
I gCaibidil 2 den Pháipéar Comhairliúcháin, leagtar amach na príomh-thograí beartais a léireofar sa Chód athbhreithnithe um Chosaint Tomhaltóirí, lena n-áirítear: Leasanna Custaiméirí a chosaint, an Digitiú, Eolas a thabhairt go héifeachtúil, Creidmheas Morgáiste agus Aistriú Morgáiste, Gníomhaíochtaí Neamhrialáilte, Calaois agus Sceamáil, Tomhaltóirí i gcúinsí leochaileacha a chosaint agus Riosca Aeráide.
Léigh Caibidil 2 ina hiomláine
Nóta: Ní oibreoidh naisc dhíreacha pdf d’úsáideoirí a bheidh ag brabhsáil ar Safari
I gCaibidil 3 den Pháipéar, leagtar amach roinnt samplaí de thograí beartais breise, taobh amujigh de na príomh-thograí beartais atá leagtha amach i gcaibidil 2. Tá feabhsuithe éagsúla beartaithe ar na ceanglais reatha, agus sa chaibidil seo, leagaimid amach na cinn is tábhachtaí díobh sin, lena n-áirítear feabhsuithe sna réimsí seo a leanas: Creidmheas Tomhaltóirí, Cosaintí FBM, Árachas, Infheistíochtaí agus Pinsin.
Léigh Caibidil 3 ina hiomláine
Nóta: Ní oibreoidh naisc dhíreacha pdf d’úsáideoirí a bheidh ag brabhsáil ar Safari
I gCaibidil 4, leagtar amach measúnú an Bhainc Ceannais ar na buntáistí éagsúla a bheidh ann do thomhaltóirí agus do ghnólachtaí rialáilte leis na feabhsuithe beartaithe seo ar an gCód athbhreithnithe. Ina theannta sin, is forbhreathnú é ar na tograí ar dóigh costais a bheith i gceist leo do ghnólachtaí rialáilte, agus saincheisteanna riachtanacha i ndáil leis an tábhacht a bhaineann le soiléireacht agus comhréireacht le linn an Cód athbhreithnithe a fhorbairt.
Léigh Caibidil 4 ina hiomláine
Nóta: Ní oibreoidh naisc dhíreacha pdf d’úsáideoirí a bheidh ag brabhsáil ar Safari
I gCaibidil 5, tugtar sonraí maidir leis an gcaoi inar féidir leat d’aiseolas ar an gcomhairliúchán a thabhairt agus leagtar amach na chéad chéimeanna eile sa phróiseas.
Léigh Caibidil 5 ina hiomláine
Nóta: Ní oibreoidh naisc dhíreacha pdf d’úsáideoirí a bheidh ag brabhsáil ar Safari
In Iarscríbhinn 1, leagtar amach bonn dlíthiúil, scóip agus struchtúr an Chóid athbhreithnithe.
Áirítear sa mhéid sin cur síos ar an mbeart comhdhlúthúcháin a rinneadh, agus forbhreathnú ar an dá dhoiciméad treorach a foilsíodh mar chuid den chomhairliúchán.
Léigh Iarscríbhinn 1 ina hiomláine
Is ionann na rialacháin nua agus comhdhlúthú ar roinnt cód agus rialachán reatha, mar aon le roinnt ceanglas feabhsaithe agus roinnt ceanglas nua. Chun cuidiú le húsáideoirí an Chóid nua a mbealach a dhéanamh tríd agus forálacha reatha agus nua a aimsiú, cruthaíodh uirlis mhapála Excel, a bhfuil treoracha inti freisin maidir leis an gcaoi inar féidir í a úsáid.
Oscail/Íoslódáil Uirlis Mhapála Excel
Tá dhá rialachán i gceist leis an gCód athbhreithnithe. Caighdeáin Ghnó agus Caighdeáin Tacaíochta Ghnó (faoi alt 17A den Acht um Athchóiriú an Bhainc Ceannais 2010), agus na Ceanglais Ghinearálta (faoi alt 48 d’Acht an Bhainc Ceannais (Maoirseacht agus Forfheidhmiú) 2013).
Tá roinnt de na Prionsabail Ghinearálta reatha ón gCód reatha le fáil sna Caighdeáin Ghnó, agus tá roinnt caighdeán breise iontu freisin.
Leis na Caighdéain Tacaíochta Ghnó, comhlánaítear oibleagáidí gnólachtaí faoi na Caighdeáin Ghnó agus tugtar sonraí agus soiléiriú breise orthu.
Íoslódáil Alt 17A de na Rialacháin
Tá dhá rialachán i gceist leis an gCód athbhreithnithe. Caighdeáin Ghnó agus Caighdeáin Tacaíochta Ghnó (faoi alt 17A den Acht um Athchóiriú an Bhainc Ceannais 2010), agus na Ceanglais Ghinearálta (faoi alt 48 d’Acht an Bhainc Ceannais (Maoirseacht agus Forfheidhmiú) 2013).
Sna Ceanglais Ghinearálta (rialacháin alt 48), arb iad an phríomhchuid den Chód athbhreithnithe iad, tá réimse ceanglas ginearálta agus trasearnálach, mar aon le ceanglais atá sonrach d’earnálacha áirithe, ina léirítear na ceanglais reatha i dteannta roinnt feabhsuithe agus roinnt rudaí nua.
Íoslódáil Alt 48 de na Rialacháin
D’fhonn tuilleadh soiléireachta agus cinnteachta a thabhairt do ghnólachtaí maidir lena gcuid oibleagáidí chun leasanna a gcustaiméirí a chosaint, agus d’fhonn tomhaltóirí i gcúinsí leochaileacha a chosaint, dréachtaíodh doiciméid treorach ar leith mar chuid den phróiseas comhairliúcháin.
Léigh an Treoir maidir le Leasanna Custaiméirí a Chosaint
Léigh an Treoir maidir le Tomhaltóirí i gCúinsí Leochaileacha a chosaint
Na Chéad Chéimeanna Eile
Beidh ár bPáipéar Comhairliúcháin ar an gCód um Chosaint Tomhaltóirí ar oscailt ar feadh trí mhí suas go dtí an 7 Meitheamh 2024. I ndiaidh an chomhairliúcháin, breithneoimid an t-aiseolas uait sula bhfoilseoimid an Cód athbhreithnithe um Chosaint Tomhaltóirí go luath in 2025, i dteannta ráiteas aiseolais ina leagfar amach na cúiseanna a bhí againn leis na nuashonruithe ar an gCód athbhreithnithe um Chosaint Tomhaltóirí.
Is sraith prionsabal agus rialacha é an Cód um Chosaint Tomhaltóirí nach mór do ghnólachtaí rialáilte airgeadais a leanúint sna cásanna seo a leanas:
• Nuair a dhíolfaidh siad táirgí agus seirbhísí airgeadais leat
• Nuair a thabharfaidh siad eolas nó comhairle airgeadais duit
• Nuair a fhógróidh siad táirgí nó seirbhísí airgeadais
• Nuair a bheidh siad ag plé le gearán uait.
Forbraíodh an Cód chun tú a chosaint mar thomhaltóirí táirgí agus seirbhísí airgeadais.
D’fhóin an Cód go maith do thomhaltóirí. Bhunaigh sé sraith láidir rialacha agus ionchas maidir leis an gcaoi inar cheart do ghnólachtaí caitheamh lena a gcuid custaiméirí. Agus lig sé dúinne idirghabháil a dhéanamh chun tomhaltóirí a chosaint - amhail dul i ngleic leis an gcaoi inar chaith an earnáil baincéireachta neamhchóir le custaiméirí morgáistí rianúcháin, nó an chaoi inar caitheadh go neamhchóir le custaiméirí dílse san earnáil árachais.
Mar sin féin, i bhfianaise go bhfuil timpeallacht na seirbhísí airgeadais ag athrú go tapa, tá athbhreithniú á dhéanamh ag an mBanc Ceannais anois ar an gCód.
Is é aidhm an athbhreithnithe seo, an Cód a nua-aoisiú chun a chinntiú go bhfuil sé oiriúnach don fheidhm agus go leanfaidh sé ar aghaidh ag cosaint tomhaltóirí sa lá atá inniu ann agus amach anseo.
Cén chaoi a bhfuil an t-athbhreithniú á dhéanamh?
Tá trí chéim i gceist leis an athbhreithniú:
I mí Dheireadh Fómhair 2022, d’fhoilsíomar Plépháipéar, inar lorgaíomar tuairimí ar na saincheisteanna a bhí ag teacht chun cinn do thomhaltóirí i dtimpeallacht athraitheach seirbhísí airgeadais.
Ansin thugamar faoi chlár forleathan rannpháirtíochta a mhair sé mhí lenár gcuid páirtithe leasmhara, ina raibh cruinnithe comhchéime, cruinnithe déthaobhacha, agus suirbhé ar líne don phobal.
Spreag an clár rannpháirtíochta seo freagairt an-dearfach agus thug sé tuiscint níos doimhne dúinn ar na dúshláin atá roimh thomhaltóirí na seirbhísí airgeadais.
I mí Iúil 2023, d’fhoilsíomar nuashonrú maidir leis an rannpháirtíocht sin chun a bhfuil foghlamtha againn go dtí seo agus a bhfuil beartaithe againn anois a chur in iúl. D’fhoilsíomar na freagraí aonair a fuarthas ar an bPlépháipéar freisin, i dteannta na dtorthaí ar shuirbhé ar líne don phobal, a bhí ar oscailt ar ár suíomh gréasáin ó mhí na Nollag 2022 go dtí mí Aibreáin 2023.
Plépháipéar
Plépháipéar faoin Athbhreithniú ar an gCód um Chosaint Tomhaltóirí – An tEolas is déanaí ar Rannpháirtíocht
Aighneachtaí a fuarthas mar fhreagra ar an bPlépháipéar
Plépháipéar faoin Athbhreithniú ar an gCód um Chosaint Tomhaltóirí – Torthaí an tSuirbhé don Phobal
I Márta 2024, d’fhoilsíomar Páipéar Comhairliúcháin ar an gCód um Chosaint Tomhaltóirí. Tugann an Páipéar Comhairliúcháin deis do pháirtithe leasmhara aiseolas a thabhairt ar an gcaoi a bhfuil sé beartaithe againn an Cód a nuashonrú. I ndiaidh na tréimhse comhairliúcháin, breithneoimid an t-aiseolas ónár gcuid páirtithe leasmhara sula bhfoilseoimid an Cód athbhreithnithe um Chosaint Tomhaltóirí, i dteannta ráiteas aiseolais ina leagfar amach na cúiseanna a bhí againn leis na nuashonruithe ar an gCód athbhreithnithe.
Tá sé mar aidhm ag an athbhreithniú seo Cód nuachóirithe nuashonraithe um Chosaint Tomhaltóirí a chur ar fáil lena gcuirfear san áireamh na forbairtí ar sheirbhísí airgeadais le blianta beaga anuas chun go leanfaidh an Cód air ag cosaint tomhaltóirí sa lá atá inniu ann agus amach anseo.
Ar na tograí sa pháipéar comhairliúcháin, áirítear na cinn seo a leanas:
- Soiléireacht a chur ar fáil do ghnólachtaí maidir lena gcuid oibleagáidí reatha um chosaint tomhaltóirí.
- An Cód a nuachóiriú agus a nuashonrú chun cosaintí do thomhaltóirí seirbhísí airgeadais a fheabhsú sa lá atá inniu ann agus amach anseo.
- Ceanglais eile um chosaint tomhaltóirí a chomhdhlúthú sa Chód agus an Cód a thiontú ina rialacháin chun creat comhsháite um chosaint tomhaltóirí a chur ar fáil.
- Tacú le tomhaltóirí agus le gnólachtaí an Cód um Chosaint Tomhaltóirí a rochtain agus rudaí a aimsiú ann trí thacaíochtaí, treoracha agus mínithe ar líne a chur ar fáil.
Tá an Páipéar Comhairliúcháin ar oscailt le haghaidh aiseolais ar feadh trí mhí suas go dtí an 7 Meitheamh 2024.
Is féidir le páirtithe leasmhara aighneachtaí a dhéanamh leis an ríomhphost chuig: [email protected] nó leis an bpost chuig Banc Ceannais na hÉireann, Bosca PO 559, Baile Átha Cliath 1.
I ndiaidh an chomhairliúcháin phoiblí, breithneoimid an t-aiseolas ónár bpáirtithe leasmhara sula bhfoilseoimid an Cód athbhreithnithe deiridh um Chosaint Tomhaltóirí, i dteanna ráiteas aiseolais ina leagfar amach ár machnamh ar an aiseolas a fuarthas.
Forbairt bhreise ar an gCód um Chosaint Tomhaltóirí
Tar éis dúinn an tAthbhreithniú a chur i gcrích agus na rialacháin deiridh a fhoilsiú, leanfaimid de mhachnamh a dhéanamh ar fheabhsuithe breise ar réimsí sonracha áirithe. Ar an gcaoi sin, beimid in ann cur leis na hathruithe atá beartaithe sa pháipéar comhairliúcháin seo, agus athruithe breise a fhorbairt bunaithe ar fhorbairtí reachtacha leanúnacha ar leibhéal intíre agus an Aontais Eorpaigh (AE) ar dóigh dóibh teacht i ndiaidh fhoilsiú an Chóid athbhreithnithe. Mar shampla, na hathruithe a bhfuiltear ag súil leo faoi reachtaíocht intíre agus AE i ndáil le rochtain ar sheirbhísí bunúsacha amhail Airgead Tirim, an Straitéis Náisiúnta Íocaíochtaí, Straitéis Infheistíochta Miondíola AE agus forbairt ar Chreat Seirbhísí Íocaíochta AE. Ar leibhéal intíre, breithneofar in am trátha an Cód a chur i bhfeidhm maidir le comhair chreidmheasa chun a chinntiú go mbeidh na cosaintí céanna ag a gcuid comhaltaí agus atá ag tomhaltóirí eile.
Taighde
Mar chuid den athbhreithniú ar an gCód um Chosaint Tomhaltóirí, rinneamar taighde tomhaltais chun cuidiú linn tuiscint níos fearr a fháil ar dhearcthaí na ndaoine sin a bhíonn ag brath ar chosaintí an chreata.
Bhí na tátail ónár gcuid taighde, i dteannta na dtorthaí ónár suirbhé ar líne, ár gcuid anailíse féin agus an aiseolais a chuir ár bpáirtithe leasmhara ar fáil trínár rannpháirtíocht Plépháipéir, mar bhonn eolais dár mbreithnithe beartais agus d’fhorbairt ár dtograí beartais atá leagtha amach sa Pháipéar Comhairliúcháin ar an gCód um Chosaint Tomhaltóirí a foilsíodh ar an 7 Márta.
Mar chuid dár rannpháirtíocht ar an athbhreithniú, thugamar aghaidh ar shráideanna Bhaile Átha Cliath chun tuairimí an phobail a fháil ar réimse ábhar a bhaineann le tomhaltóirí. Breathnaigh ar na físeáin thíos.
(Is gá fianáin a chur “ar siúl” chun breathnú ar an bhfíseán thuas) I Athscríbhinn den fhíseán “Word on the Street” (PDF 120.5KB)