Buaileann Banc Ceannais na hÉireann le hionadaithe ó ghnóthaí as Co. Lú agus as Co. an Chláir

Tháinig Gobharnóir Bhanc Ceannais na hÉireann, Gabriel Makhlouf, agus Stiúrthóir na nInstitiúidí Creidmheasa, Mary-Elizabeth McMunn, le chéile le lucht gnó ó Chontae Lú agus ó Chontae an Chláir inniu le linn seimineár gréasáin mar chuid de chlár for-rochtana an Bhainc Ceannais.

Le linn an tseimineáir gréasáin, rinne ionadaithe gnó ó Chomhlachas Tráchtála Dhún Dealgan agus Inse plé ar na saincheisteanna a bhfuil aghaidh le tabhairt orthu ag FBManna agus gnólachtaí níos mó sna ceantair sin agus thug sé an deis don Ghobharnóir Makhlouf agus do Mary-Elizabeth McMunn Uasal cluas a thabhairt do ghnóthaí ar fud na tíre, ceisteanna uathu a fhreagairt agus tuiscint a fháil ar na dúshláin atá rompu.

Dúirt an Gobharnóir Makhlouf i ndiaidh na gcruinnithe, "Bainim sult i gcónaí as bualadh le hionadaithe ó ghnóthaí Éireannacha agus ba amhlaidh sin inniu. Tugann imeachtaí for-rochtana mar seo deis dúinn léargas níos fearr a fháil ar na saincheisteanna atá tábhachtach do dhaoine agus do phobail ar fud na tíre agus cloisteáil faoin gcaoi ina mbíonn tionchar ag obair an Bhainc Ceannais ar a saol.‏

Ag labhairt dó faoi chlár for-rochtana an Bhainc Ceannais, dúirt sé "Tá sraith imeachtaí for-rochtana mar é seo óstáilte againn le linn na bliana. Tá na cruinnithe seo thar a bheith luachmhar dúinn chun ár sainordú a chomhlíonadh. Bíonn na dearcthaí ar leith ón lucht freastail mar bhonn eolais dár gcuid oibre agus cuidíonn sé linn léargas a fháil ar an bhfíorgheilleagar.”